Կալիֆոռնիայի մի շարք օկրուգներում արտակարգ դրության ռեժիմ է հայտարարվել հրդեհների պատճառով
Կալիֆոռնիայի երեք օկրուգներում արտակարգ դրության ռեժիմ է հայտարարվել բնական հրդեհների պատճառով, որոնց հետեւանքով արդեն զոհվել է մեկ մարդ, հաղորդվում է նահանգապետ Ջերի Բրաունի կայքում։
Կայքում հրապարակված հայտարարությունների համաձայն՝ արտակարգ դրության ռեժիմ է հայտարարվել Մարիպոսայի, Ռիվերսայդի եւ Շաստայի օկրուգներում: «Հրդեհը, որն ընդգրկել է ավելի քան 43 հազար ակր հող (ավելի քան 17 հազար հեկտար), տակավին սպառնալիք է ներկայացնում տների եւ այլ կառույցների համար, ինչը բնակիչների տարահանում է պահանջում»,- ասված է հայտարարության մեջ:
Ավելի վաղ հաղորդվել էր 12 հազար մարդու տարահանման մասին:
Կալիֆոռնիայի նահանգապետը նաեւ հավաստել Է հրդեհների պատճառով մեկ մարդու մահը: Խոսքը վերաբերում է նահանգի անտառային տնտեսության եւ հակահրդեհային պաշտպանության դեպարտամենտի աշխատակցին, որը զոհվել է բռնկումը վերացնելու ժամանակ: Նահանգի հրշեջ ծառայությունը նաեւ հայտնել է յոթ տուժածների մասին, հաղորդել է ՌԻԱ Նովոստին:
