Ահազանգ. «Արմօյլ»-ը շարունակում է կառուցել գործարանը. Արթուր Գրիգորյանը գործարանում է
Օրերս Բնապահպանության և ընդերքի տեսչական մարմնի ղեկավար Արթուր Գրիգորյանը կայացրել է Կոտայքի մարզի Եղվարդ քաղաքի Նատի թաղամասում «Արմօյլ» ՓԲԸ կողմից նավթավերամշակման գործարանի շինարարությունը կասեցնելու մասին որոշում մինչև «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով նախատեսված հիմնադրութային փաստաթղթերի շրջակա միջավայրի վրա ազդեցության գնահատումը և փորձաքննության դրական որոշման ստացումը:
Այսօր, սակայն, Եղվարդ քաղաքի Նատի թաղամասի բնակիչներից EcoNews.am-ն է ստացել, որ գործարանի շինարարական աշխատանքները շարունակվում են: Նրանցից մեկը կայքի հետ զրույցում նշեց, որ աշխատանքները շարունակվում են և՛ գիշերը, և՛ ցերեկը:
«Ոչ միայն աշխատանքներ են տեղի ունենում, այլև նոր աշխատողներ են ընդունում, որպեսզի արագ ընթանա գործը: Ու այդ ամեն ինչը գաղտնի են անում: Այն ժամանակ, եթե մեքենաներն ավելի շատ էին գործարանի դիմաց, այժմ աշխատողները մեքենաներով չեն գալիս, որպեսզի չերևա, որ աշխատում է»,- ասել է քաղաքացին:
Տեղեկությունը ճշտելու նպատակով EcoNews.aը կապ է հաստատել նաև Բնապահպանության և ընդերքի տեսչական մարմնի ղեկավարի մամուլի քարտուղար Վրույր Պեպանյանի հետ, ով հայտնել է, որ տեսչական մարմնի ղեկավար Արթուր Գրիգորյանն անձամբ այս պահին գտնվում է «Արմօյլ» ՓԲԸ գործարանի տարածքում՝ ծանոթանալու խնդրին: Տեսչական մարմնի աշխատանքների մասին կտեղեկացնենք ավելի ուշ:
