«ԲԱԳԵԶՅԱՆ» ընկերությունը դադարեցնում է իր գործունեությունը «Մերիդիան» ազատ տնտեսական գոտում
«ԲԱԳԵԶՅԱՆ» ընկերությունը դիմել է կառավարություն՝ խնդրելով դադարեցնել «Մերիդիան» ազատ տնտեսական գոտու շահագործողի իր թույլտվությունը: Հարցն ընդգրկված է կառավարության օրակարգում, չզեկուցվող հարցերի շարքում։
Որոշման հիմնավորման մեջ նշվում է, որ ընկերությունն է ցանկություն հայտնել դադարեցնել իր գործունեությունը «Մերիդիան» ԱՏԳ տարածքում և շարունակել իր գործունեությունն ազատ տնտեսական գոտու տարածքից դուրս։
«ԲԱԳԵԶՅԱՆ» ՍՊԸ-ն «Մերիդիան» ԱՏԳ շահագործող է 2016 թվականի մարտի 24-ից։ Պետռեգիստրում դրա հիմնադիրներ են նշված Թուրքիայի 2 քաղաքացիներ՝ Սերկիս Բագը և Սաիտ Գեզը։
ՀՀ-ում ազատ տնտեսական գոտիները նպատակ ունեն ներգրավել ներդրումներ, խթանել բարձր և տեղեկատվական տեխնոլոգիաների ոլորտում ստեղծված արդյունքի արտահանումը, նպաստել տվյալ հատվածում հայկական բրենդի ճանաչմանն ու տարածմանը: Թե ի՞նչն է պատճառը, որ ընկերությունը նման որոշում է կայացրել, նախագծում չի նշվում։
