Ալոն ու Մասիվցի Անդիկը ձերբակալվել են. մանրամասներ

Ոստիկանության քրեական հետախուզության գլխավոր վարչությունում հարուցված քրեական գործի շրջանակներում հունիսի 20-ին բերման ենթարկված թվով 30 «օրենքով գողերից» և քրեական հեղինակություններից ձերբակալվել են 2-ը՝ Ալո մականմամբ Ալեքսանդր Մակարյանը և Մասիվցի Անդիկ մականմամբ Անդրանիկ Հարությունյանը։ Այս մասին 168.am-ին հայտնեցին Ոստիկանության Հասարակայնության հետ կապի և լրատվության վարչությունից՝ ի պատասխան մեր հարցմանը, թե նրանցից ո՞վ է ազատ արձակվել, և բնակարանների խուզարկության ժամանակ հայտնաբերված զենք-զինամթերքն օրինակա՞ն է եղել, թե՞ ոչ, թմրամիջոցների ու այլ իրերի փորձաքննությունների արդյունքները ե՞րբ հայտնի կլինեն։

Տվյալ անձինք ձերբակալվել են թմրամիջոցների անօրինական շրջանառության կասկածանքով։ Մյուսները որպես վկա հարցաքննվել և ազատ են արձակվել։

«Նրանց բնակարանների խուզարկությամբ հայտնաբերված զենք-զինամթերքի օրինակությունը ստուգվում է, նշանակված են համապատասխան փորձաքննություններ։

Քրեական գործի նախաքննությունը շարունակվում է»,- նշել են ոստիկանության ՀԿԼ վարչությունից։

Հիշեցնենք, որ հունիսի 20-ին ոստիկանության մի շարք ստորաբաժանումների ծառայողներ, դատարանի որոշումներով, խուզարկություններ էին կատարել, այսպես կոչված «օրենքով գողերի» բնակարաններում, մասնավորապես՝ Մանեթի տղա Սամվելիկ մականվամբ Սամվել Հարությունյանի, «Աֆուլիկ մականվամբ Ռաֆայել Խոյեցյանի, Շահումյանցի Ժիրո մականվամբ Ժիրայր Բրուտյանի, Լեննականցի Սուրո մականվամբ Սուրեն Ավետիսյանի, Լեննականցի Արտյոմիկ մականվամբ Արտյոմ Ղազարյանի, Զապ մականվամբ Անդրանիկ Սողոյանի, Սևո մականվամբ Արմեն Մանուկյանի, Մասիվցի Անդիկ մականվամբ Անդրանիկ Հարությունյանի, Ալո մականվամբ Ալեքսանդր Մակարյանի, Գորիսեցի Արտեմիկ մականվամբ Արտեմ Դինունցի, Օշականցի Գևորիկ մականվամբ Գևորգ Մելիքյանի, Քոնչո մականվամբ Նորայր Փիլոյանի բնակարաններում։

Ոստիկանները, հարուցված քրեական գործի շրջանակներում, նույն օրը, դատարանի որոշումներով, խուզարկել էին նաև քրեական հեղինակություններ՝ Մեծամորի Երո մականվամբ Երվանդ Ոսկանյանի, Շալո մականվամբ Շալիկո Մանուչարյանի, Վիրաբիկ մականվամբ Վիրաբ Գասպարյանի, Պիստ մականվամբ Արմեն Իսրայելյանի, Էրեբունիմասիվցի Տյոմ մականվամբ Արտյոմ Հարությունյանի, Նորադուսցի Արա մականվամբ Արա Բանդուրյանի, Արտյոմ Կանևսկոյ մականվամբ Արտյոմ Հարությունյանի, Մասիվցի Ժիրո մականվամբ Պարույր Աղաջանյանի, Յա-Յա մականվամբ Արմեն Գրիգորյանի, Տիզ մականվամբ Արթուր Սեդրակյանի, Պռատ մականվամբ Ռադիկ Մկրտչյանի, Մասիվցի Ռաֆո մականվամբ Ռաֆայել Նազարյանի, Դմբուզ Հենդո մականվամբ Հենրիկ Մանուկյանի, Տույ մականվամբ Արթուր Ղազարյանի, Կիևյանցի Յուրա մականվամբ Յուրի Ուտոևի, Մասիս մականվամբ Մասիս Գրիգորյանի, Բոգո մականվամբ Ռուբեն Կոստանյանի և Պռոշյանցի Գևորիկ մականվամբ Գևորգ Ավետիսյանի բնակարանները։

Արդյունքում՝ հայտնաբերվել էին զենք-զինամթերք, թմրամիջոցներ և այլն։ Մասնավորապես՝ Մասիվցի Անդիկ մականվամբ «օրենքով գող» Անդրանիկ Հարությունյանի բնակարանում հայտնաբերվել էին մետադոնի նմանվող դեղահաբեր, բյուրեղանման զանգված ու հրացան։ Ալո մականվամբ «օրենքով գող» Ալեքսանդր Մակարյանի բնակարանի խուզարկությամբ հայտնաբերվել էին «Մակարովի» փամփուշտներ ու մարիխուանայի նմանվող զանգված։ Մարիխուանայի նմանվող զանգված էր հայտնաբերվել նաև Գորիսեցի Արտեմիկ մականվամբ «օրենքով գող» Արտեմ Դինունցի բնակարանի խուզարկությամբ։ Օշականցի Գևորիկ մականվամբ «օրենքով գող» Գևորգ Մելիքյանի տան խուզարկությամբ՝ բակում հայտնաբերվել էին կանեփի թփեր։ Քոնչո մականվամբ «օրենքով գող» Նորայր Փիլոյանի տան բակից ևս կանեփի թփեր էին հայտնաբերվել։

Մեծամորի Երո մականվամբ քրեական հեղինակություն Երվանդ Ոսկանյանի բնակարանի խուզարկությամբ հայտնաբերվել էին փամփուշտներ։ Շալո մականվամբ քրեական հեղինակություն Շալիկո Մանուչարյանի բնակարանից հայտնաբերվել էին հրազեն ու փամփուշտներ։ Վիրաբիկ մականվամբ քրեական հեղինակություն Վիրաբ Գասպարյանի բնակարանի խուզարկությամբ հայտնաբերվել էին դեղահաբեր, որոնցից երկուսը՝ մետադոնի նմանվող։ Պիստ մականվամբ քրեական հեղինակություն Արմեն Իսրայելյանի տնից հայտնաբերվել էր հրազեն ու հրացաններ։ Էրեբունիմասիվցի Տյոմ մականվամբ քրեական հեղինակություն Արտյոմ Հարությունյանի բնակարանի խուզարկությամբ հայտնաբերվել էր հրացան։ Արտյոմ Կանևսկոյ մականվամբ քրեական հեղինակություն Արտյոմ Հարությունյանի բնակարանի խուզարկությամբ հայտնաբերվել էին հրացան ու փամփուշտներ, Նորադուսցի Արա մականվամբ քրեական հեղինակություն Արա Բանդուրյանի բնակարանի խուզարկությամբ հայտնաբերվել էր հրացան, փամփուշտ, թուր և մահակ։ Մասիվցի Ժիրո մականվամբ քրեական հեղինակություն Պարույր Աղաջանյանի բնակարանում հայտնաբերվել էին հրազեն, դանակներ ու մահակներ։

Հիշյալ «օրենքով գողերն» ու քրեական հեղինակությունները բերման էին ենթարկվել ոստիկանության տարածքային բաժիններ։ Նրանց բնակարաններից հայտնաբերված զենք-զինամթերքը, թմրամիջոցի նմանվող զանգվածներն ու այլ իրեր ուղարկվել էին ոստիկանության փորձաքրեագիտական վարչություն։ Նշանակվել էին փորձաքննություններ։