Կառավարական առանձնատների ջրի պարտքի մասին հայտարարությունը վրիպակ է. վարչապետի խոսնակ. «Ազատություն»
Վարչապետ Նիկոլ Փաշինյանի խոսնակ Արման Եղոյանը տեխնիկական վրիպակ որակեց 54 միլիոն դրամ թիվը, որը երեկ վարչապետը նշել էր որպես կառավարական առանձնատների ջրի պարտքի ընդհանուր գումար։ «Ազատություն» ռադիոկայանի փոխանցմամբ՝ Եղոյանը նշել է, որ հանձնարարվել է ճշտել պարտքերի առկայությունը, դրանց չափը և ներկայացնել հստակ տվյալներ։
– Պարոն Եղոյան, կառավարությունը պաշտոնապես տեղեկատվություն տարածեց, ըստ որի, վարչապետը նշում է, որ «Կոնդի առանձնատների տնտեսության» ՊՈԱԿ-ի տարածքում առկա կառավարական առանձնատների սպառած ջրի դիմաց կուտակած պարտքը հասնում է 54 միլիոն դրամի», և հավելեց, որ արդեն իսկ հանձնարարել է, որպեսզի այդ պարտքերը վճարվեն։ Հաշվի առնելով, որ կառավարական առանձնատներում վարչապետն է բնակվում, նախարարներն են բնակվում, ստացվում է, որ նախորդ կառավարության անդամները պարտքե՞ր են կուտակել և չե՞ն վճարել։
– Ուղղակի մի ճշգրտում անեմ կոնկրետ թվի հետ կապված՝ կոնկրետ նշված թիվը եղել է տեխնիկական վրիպակ: Ինչ վերաբերում է պարտքերին, ապա՝ այո, հանձնարարվել է ճշտել պարտքերի առկայությունը, դրանց չափը և ներկայացնել հստակ տվյալներ։ Սա է եղել, իսկ այդ թիվն ուղղակի եղել է վրիպակ։ Պարտքերի չափը, կամ դրանց առկայությունն այս պահին ճշտվում է։
– Դեռևս հստակ չէ՞՝ պարտքեր կուտակե՞լ են կառավարության նախկին անդամները, թե՞՝ ոչ։
– Այս պահին այդ հարցը ճշգրտվում է։
– Այդ դեպքում հաղորդագրությունն ինչի՞ մասին է, որտեղ հստակ նշված է, որ Փաշինյանը հանձնարարել է, որպեսզի այդ պարտքերը վճարվեն։
– Ես հենց հիմա հայտարարությունն եմ ճշգրտում, հանձնարարվել է ճշտել առկայությունը, դրանց չափը և առկայության դեպքում վճարել։
– Կարո՞ղ ենք ասել, որ վրիպակ է ոչ միայն այդ 54 միլիոնի պարտքն, այլև ընդհանրապես պարտքի առկայությունը, այդ ամենը դեռ պետք է ճշտվի։
– Դա այս պահին գտնվում է ուսումնասիրման փուլում, այո, այո։
Հիշեցնենք՝ վարչապետ Նիկոլ Փաշինյանը, երեկ ընդունելով «Վեոլիա» ընկերության Կենտրոնական և Արևելյան Եվրոպայի երկրների գծով գործադիր փոխնախագահ Մալիկա Գենդուրիին, ասել է, որ անհրաժեշտ է հետևողական քայլեր իրականացնել ջրի կորուստների ծավալները նվազեցնելու ուղղությամբ՝ հավելելով, որ դա կնպաստի նաև սակագնային արդյունավետ քաղաքականությանը:
Վարչապետը նաև, ըստ պաշտոնական հաղորդագրության, նշել է, որ «Կոնդի առանձնատների տնտեսություն» ՊՈԱԿ-ի տարածքում առկա կառավարական առանձնատների սպառած ջրի դիմաց կուտակած պարտքը հասնում է 54 մլն դրամի և հավելել, որ արդեն իսկ հանձնարարել է, որպեսզի այն վճարվի»:
Այս համատեքստում, Նիկոլ Փաշինյանը կարևորել է, որպեսզի ընկերությունը հետևողական լինի բոլոր նման դեպքերում և բարձրացնի գործունեության արդյունավետությունը՝ ուշադրության տակ պահելով ոչ միայն անապահով և խոցելի խավերին, այլև հատկապես՝ վճարունակ, բայց անպարտաճանաչ սպառողներին։
