«Սարի թաղի» գործով 4 ամբաստանյալներ կալանքից ազատ են արձակվել
«Սարի թաղի» գործով ամբաստանյալներ Հրայր Իսախանյանի, Էդուարդ Զեյթունյանի, Հարություն Թորոսյանի և Անդրանիկ Քյոսեյանի կալանքը որպես խափանման միջոց փոխելու վերաբերյալ միջնորդությունները դատավոր Աննա Դանիբեկյանը բավարարեց: Այս մասին իր ֆեյսբուքյան էջում գրառում է կատարել Հրայր Իսախանյանի պաշտպան Գրիշա Բալասանյանը:
«Սարի թաղ»-ի գործով պաշտպանյալիս` Հրայր Իսախանյան.-ի և մյուսների` Հարություն Թորոսյանի, Էդուարդ Զեյթունյանի նկատմամբ կիրառված կալանքը որպես խափանման միջոց, փոխվեց այլընտրանքային խափանման միջոցով` ստորագրություն չհեռանալու մասին: Անդրանիկ Քյոսեյանի դեպքում կիրառվեց գրավ»,- ասել է նա:
Հարություն Թորոսյանին, Հրայր Իսախանյանին, Անդրանիկ Քյոսեյանին, Էդուարդ Զեյթունյանին մեղադրանք է առաջադրվել այն բանի համար, որ նրանք 2016 թվականի հուլիսի 19-ին ժամը 20.00-ի սահմաններում, Երևան քաղաքի Մովսես Խորենացի փողոցին հարող` Գլինկա և Որմնադիրների փողոցների հատման վայրում առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ:
