Կիմ Չեն ընը Սինգապուր կժամանի հունիսի 10-ին. Yonhap
ԿԺԴՀ-ի առաջնորդ Կիմ Չեն Ընը կիրակի օրը՝ հունիսի 10-ին, կժամանի Սինգապուր՝ մասնակցելու ԱՄՆ-ի նախագահ Դոնալդ Թրամփի հետ կայանալիք հանդիպմանը: Այդ մասին հայտնել է Yonhap գործակալությունը:
CNN հեռուստաալիքը՝ հղում անելով աղբյուրների, հայտնել է, որ ԱՄՆ-ի եւ ԿԺԴՀ-ի արաջնորդների բանակցությունները, իրադարձությունների դրական զարգացման դեպքում, կարող են տեւել երկու օր: Սպիտակ տանը չեն մեկնաբանել հեռուստաալիքի տեղեկատվությունը:
Ավելի վաղ Թրամփը հայտարարել է, որ, իր կարծիքով, ԿԺԴՀ-ի հետ երկխոսությունը կդառնա «գործընթաց», որը տեղի կունենա ոչ մեկ հանդպման ընթացքում: Մինչ այդ ամերիկյան վարչակազմի աղբյուրները, որոնք ծանոթ են երկու երկրների ղեկավարների գագաթնաժողովի նախապատրաստման պլաններին, հայտնել են, որ ԱՄՆ-ի նախագահ Դոնալդ Թրամփը ցանկանում է, որ ԿԺԴՀ-ի առաջնորդ Կիմ Չեն Ընը Սինգապուրում սպասվող իրենց հանդիպման ընթացքում հայտարարի Փհենյանի միջուկային զինաթափման իր հանձնառության մասին:
Սպիտակ տունը հայտնել է, որ Սինգապուրում երկու ղեկավարների գագաթնաժողովը կսկսվի հունիսի 12-ին տեղական ժամանակով ժամը 09:00-ին (Երեւանի ժամանակով ժամը 05:00-ին) սինգապուրյան Սենտոսա կղզու Capella հյուրանոցում, հաղորդել է ՏԱՍՍ-ը:
