Զեմանը վերստին Չեխիայի վարչապետ նշանակեց միլիարդատեր Անդրեյ Բաբիշին
Չեխիայի նախագահ Միլոշ Զեմանը հունիսի 6-ին վերստին վարչապետ է նշանակել ANO շարժման առաջնորդ եւ դոլարային միլիարդատեր Անդրեյ Բաբիշին եւ հանձնարարել է նրան՝ կազմել կառավարություն:
«Ձեզ նշանակում եմ կառավարության նախագահ եւ հուսով եմ, որ ձեզ կհաջողվի արագորեն ու որակյալ ձեւով կազմել նոր կաբինետ»,-հայտարարել է նախագահը՝ դիմելով Բաբիշին: Արարողությունը ցուցադրվել է հանրապետական հեռուստատեսությամբ:
Բաբիշի գլխավորած ANO կենտրոնամետ շարժումը համոզիչ հաղթանակ է տարել 2017 թվականի հոկտեմբերին կայացած խորհրդարանական ընտրություններում, ինչից հետո նախագահը նրան նշանակել է վարչապետ: Սակայն Բաբիշի կազմած փոքրամասնության կառավարությունը այս տարվա հունվարին վստահության քվե չստացավ խորհրդարանում, ինչից հետո Բաբիշը շարունակեց գործընկերների որոնումն իր շարժման համար:
Արդյունքում՝ ANO-ի հետ կոալիցիայի մեջ մտնելուն համաձայնեցին սոցիալ-դեմոկրատները, որոնք ակնկալում են նոր կաբինետում ստանալ 15 նախարարական պաշտոններից հինգը, այդ թվում՝ ԱԳ նախարարության ղեկավարի պաշտոնը: Խորհրդարանում անհրաժեշտ մեծամասնություն ունենալու համար կառավարությունը մտադիր էխորհրդարանում հենվել կոմունիստների ձայների վրա, հաղորդել է ՌԻԱ Նովոստին:
