Լուկաշենկոյի օգնականը ձերբակալվել է 200 հազար դոլար կաշառք ստանալիս
Բելառուսի նախագահի օգնական – Գրոդնոյի մարզի տեսուչ Սերգեյ Ռովնեյկոն ձերբակալվել է 200 հազար դոլար կաշառք ստանալիս: Այդ մասին հայտնել են երկրի Պետական անվտանգության կոմիտեում (ՊԱԿ):
«Պետության ղեկավարի հանձնարարությամբ իրականացված օպերատիվ-հետախուզական միջոցառումների արդյունքում շորթման եւ 200 հազար դոլարի չափով կաշառքի ստացման ժամանակ փաստական ապացույցներով ձերբակալվել է Բելառուսի Հանրապետության նախագահի օգնական – Գրոդնոյի մարզի տեսուչ Սերգեյ Վասիլի Ռովնեյկոն»,- տեղեկացրել են ՊԱԿ-ում:
Ինչպես պարզաբանել են կոմիտեում, Ռովնեյկոն օպերատիվ ստորաբաժանումների տեսադաշտում է հայտնվել ավելի քան մեկ տարի առաջ՝ իր իրավասության մեջ մտնող հարցերի լուծման համար տարբեր անձանցից կաշառքների ստացման բազմակի փաստերի վերաբերյալ տեղեկատվության առնչությամբ:
Գերատեսչությունում նաեւ հայտնել են, որ Ռովնեյկոյի նկատմամբ հարուցվել է քրեական գործ, նրան սպառնում է ազատազրկում մինչեւ 15 տարի ժամկետով: Ներկայում կասկածյալը գտնվում է քննչական մեկուսարանում, հաղորդել է «Ինտերֆաքս»-ը:
