«Նիկոլ Փաշինյանը ներքին լեգիտիմության հսկայական պաշար ունի». թուրքագետ
Թուրքագետ Անուշ Հովհաննիսյանը կարծում է, որ ՀՀ վարչապետ Նիկոլ Փաշինյանը ներքին լեգիտիմության հսկայական պաշարի է տիրապետում, որի կապիտալիզացումը կարող է օգուտներ բերել արտաքին քաղաքականության մեջ: Այս մասին նա նշեց մայիսի 18-ին կայացած մամուլի ասուլիսի ժամանակ:
«Միջազգային հարթակներում լեգիտիմության գործոնը հաշվի են առնում: Նիկոլ Փաշինյանը ներքին լեգիտիմության հսկայական պաշար ունի, ինչը ցանկացած հարաբերություններում նրան դնում է ամուր հիմքերի վրա՝ չանտեսելով, իհարկե, օբյեկտիվ գործոնները: Հմուտ արտաքին քաղաքականություն վարելու պարագայում այն կարելի է օգտագործել»,-ասաց փորձագետը:
Չնայած Թուրքիայում Հայաստանի ներքաղաքական իրադարձությունների վերաբերյալ տեղեկատվական բնույթի անդրադարձներին, այդուհանդերձ, Անուշ Հովհաննիսյանի խոսքով, հայաստանյան թեման թուրքական քաղաքական դաշտում և հասարակական քննարկումներում բոլորովին էլ առաջնային չէ։ Թուրքագետի դիտարկմամբ՝ Թուրքիայում հիմա զբաղված են ավելի շատ ներքին և տարածաշրջանային այլ խնդիրներով, մասնավորապես, խորհրդարանական ընտրություններով, թուրք-իսրայելական, ինչպես նաև Թուրքիա-ԱՄՆ հարաբերությունների սրմամբ։
«Թուրքական մամուլը հիմա զբաղված է այլ բաներով, քանի որ կարևորագույն գործընթացներ են հիմա տեղի ունենում Թուրքիայում, և այս նախընտրական փուլը փաստորեն նորություններ է բերում այդ երկրի համար, Հայաստանի ներքին զարգացումները բոլորովին էլ առաջնային չեն»,-հավելեց Անուշ Հովհաննիսյանը։
