Սերժ Սարգսյանի հանձնարարականով սահմանամերձ Ներքին Կարմիրաղբյուրի մարզադաշտը վերակառուցվելու է
ՀՀ Նախագահ Սերժ Սարգսյանի հանձնարարականով՝ Հայաստանի ֆուտբոլի ֆեդերացիայի նախագահ Ռուբեն Հայրապետյանը մարտի 25-ին աշխատանքային այցով մեկնեց Տավուշի մարզի Ներքին Կարմիրաղբյուր գյուղ, որտեղ Բերդի խոշորացված համայնքի ղեկավարի հետ քննարկեց մարզադաշտի վերակառուցման հարցերը: Լրագրողների հետ զրույցում Ռուբեն Հայրապետյանը նշեց, որ Նախագահն իրեն հանձնարարել է ավելի մեծ ուշադրություն դարձնել սահմանամերձ գյուղերին:
«Նախագահի հանձնարարականով եմ այստեղ, և ափսոսում եմ, որ ավելի շուտ չեմ եկել, չեմ զբաղվել այս հարցով: Սահմանամերձ գյուղի երեխաների համար ավելի շուտ պետք է պայմաններ ստեղծեինք ֆուտբոլով զբաղվելու համար: Ներքին Կարմիրաղբյուր գյուղ կատարած այցի նպատակն այստեղ մարզադաշտի կառուցման հարցերը քննարկելն է: Մարզադաշտի չափսերը լինելու են 65-ը 110-ի մետրի վրա: Այն թույլ կտա նույնիսկ հանրապետական առաջնության խաղեր անցկացնել այստեղ: Մարզադաշտը կկառուցվի բոլոր չափորոշիչներին համապատասխան: Կկառուցվեն նաև հանդերձարաններ: Կարծում եմ, որ մի քանի ամսից կունենանք շատ գեղեցիկ մարզադաշտ»,- «Արմենպրես»- ի հաղորդմամբ՝ ասաց Հայրապետյանը:
Նրա խոսքով՝ պայմանավորվածություններ են ձեռք բերվել մարզիչների փորձի փոխանակման վերաբերյալ և արդեն հանձնարարվել է 5 մարզչի ուղարկել ֆեդերացիա` վերապատրաստման:
«Թե տեղափոխության, թե՛ կացության և թե դասընթացների ծախսերը կհոգա Հայաստանի ֆուտբոլի ֆեդերացիան: Առանց մարզիչների վերապատրաստման մարզադաշտի կառուցումը, կարծում եմ, իզուր կլինի»,- նշեց Հայրապետյանը:
ՀՀՖ նախագահը նշեց, որ շինարարական աշխատանքները այսօրվանից կսկսվեն և մինչև սեպտեմբեր մարզադաշտը կբացվի:
«Ես, համենայն դեպս, խնդիրն այնպես եմ դրել, որ սեպտեմբերի 1-ին պետք է այստեղ լինեմ և կատարեմ բացման արարողությունը: Ինչպես նշեցի, ափսոսում եմ, որ ուշացած եմ եկել և ինքս ինձ նույնիսկ մեղադրում եմ դրա համար: Ոգևորությունը մեծ է ինչպես երեխաների, այնպես էլ նրանց դպրոցի տնօրենի, ֆիզկուլտուրայի ուսուցչի մոտ, ինչը շատ կարևոր է: Ամեն դեպքում, լավ է ուշ, քան երբեք»,- ասաց նա:
Այն հարցին, թե կան արդյոք սահմանամերձ այլ գյուղեր կամ մարզեր, որտեղ դարձյալ նմանատիպ ծրագրեր կիրականացվեն, Ռուբեն Հայրապետյանի պատասխանեց՝ արդեն կա ՀՀ Նախագահի կողմից հանձնարարական, որ պետք է մեծ ուշադրություն դարձնել սահմանամերձ գյուղերին:
«Մեր խնդիրն այստեղ մանկապատանեկան առաջնություններ կազմակերպելն է: Ծրագրում ենք սահմանամերձ երեք գյուղի միավորումով կազմավորել թիմեր, որոնք կմասնակցեն ինչպես մարզային, այնպես էլ` հանրապետական առաջնությանը»,- եզրափակեց Հայրապետյանը:
Բերդի խոշորացված համայնքի (համայնքում ընդգրկված են 17 փոքր համայնքներ) ղեկավար Հարություն Մանուչարյանը նշեց, որ խորհրդային տարիներին Ներքրին ԿարմիրԱղբյուրը և, ընդհանրապես, Բերդի տարածաշրջանը աչքի է ընկել ֆուտբոլով:
«Ցավոք սրտի, ֆուտբոլային մարզադաշտերի անմխիթար լինելու և հակառակորդի կրակոցների տակ գտնվելու պատճառով բավականին հետ մնացինք այս ոլորտում: Հիմա Ռուբեն Հայրապետյանի կողմից մշակվել է մեծ ծրագիր ոչ միայն Ներքին Կարմիրաղբյուր գյուղի համար, այլ նաև հարակից գյուղերի համար ֆուտբոլային մարզադաշտեր կառուցել: Կարծում եմ, որ երեք ֆուտբոլային մարզադաշտ 17 համայքների համար լիովին կբավարարի»,- ասաց Մանուչարյանը:
Համայնքի ղեկավարի խոսքով՝ սահմանապահ ժողովուրդը ավելի շատ կարիք ունի վերաբերմունքի, քան նյութական օգնության:
« Սահմանապահ ժողովուրդը պետք է լինի առողջ, ուժեղ և՛ ֆիզիկապես, և՛ հոգեպես: Համոզված եմ, որ այս ֆուտբոլային մարզադաշտը կտա և ֆիզիկական և հոգեկան առողջություն»,- նշեց Մանուչարյանը:
