ՏՄՊՊՀ-ն վարչական վարույթ է հարուցել «Յուքոմի» դեմ անբարեխիղճ գովազդի համար
ՀՀ տնտեսական մրցակցության պաշտպանության պետական հանձնաժողովը հարուցել է վարչական վարույթ «Յուքոմ» ընկերության հանդեպ:
Հանձնաժողովի նախաձեռնությամբ կատարվել է ուսումնասիրություն՝ հեռուստատեսային գովազդի շուկայում, որի արդյունքում պարզվել է հետևյալը. «Յուքոմ» ընկերությունը գովազդում է «Հեղափոխական առաջարկ» անվանումով իր նոր ծառայությունը, որով ֆիքսված կապի իր բաժանորդներին առաջարկում է օգտվել շարժական հեռախոսակապի «Ունիվերսալ» ծառայությունից: Թվարկելով փաթեթին միանալու մի շարք պայմաններ, ընկերությունը սպառողներին որևէ կերպ չի տեղեկացնում էական պայմաններից մեկի մասին. այն է՝ վերոնշյալ ծառայությունից կարելի է օգտվել միայն փաթեթին 2 տարով բաժանորդագրվելու դեպքում: Բացի այդ,
գովազդում ցուցադրվում է մի խումբ անձանց կողմից պաստառների միջոցով «ցույցի» անցկացման գործընթաց, որի ընթացքում ցուցադրված կանաչ գույնի պաստառներից մեկի վրա սպիտակ տառերով նշված է «ԿԱՆԱՉԻՆ` ԱՅՈ, ՄՆԱՑԱԾԻՆ` ՉԱՅՈ» արտահայտությունը:
Ինչպես տեղեկացրին ՏՄՊՊՀ-ից, ՀՀ Մրցակցային մարմնի գնահատմամբ, գովազդի ընթացքում ցուցադրված գրությունը, ինչպես նաև ծառայության էական պայմանների մասին ոչ ամբողջական տեղեկատվությունը կարող է ստեղծել տնտեսվարող սուբյեկտի, նրա գործունեության կամ առաջարկած ապրանքների վերաբերյալ հասարակության մոլորեցման, ինչպես նաև տնտեսվարող սուբյեկտի համբավի կամ վարկարժեքի վնասման հնարավորություն: Հաշվի առնելով վերոնշյալ հանգամանքները, Հանձնաժողովը վարչական վարույթի շրջանակում կքննի «Յուքոմ» ընկերության կողմից օրենքի հնարավոր խախտման, մասնավորապես անբարեխիղճ մրցակցության դրսևորման հարցը:
Հանձնաժողովը տնտեսվարողներին մեկ անգամ ևս հորդորում է առաջարկվող ապրանքների կամ ծառայությունների վերաբերյալ սպառողներին տրամադրել հավաստի և ամբողջական տեղեկատվություն:
