Օփիոիդային ցավազրկողներն ու սինթետիկ oփիոիդները հազարավոր ամերիկացիների մահվան պատճառ են դարձել
ԱՄՆ-ի Գլխավոր դատախազ և արդարադատության նախարար Ջեֆ Սեշնզը ԱՄՆ-ի Օփիոիդների ճգնաժամի դեմ պայքարին անդրադառնալով՝ հայտարարել է նոր և ավելի խիստ պատժամիջոցների մասին: Այս մասին տեղեկացնում է «Ամերիկայի ձայնը»:
Օփիոիդային ցավազրկողներն ու սինթետիկ oփիոիդները 2016 թվականին 64 հազար ամերիկացիների մահվան պատճառ են հանդիսացել: Անդրադառնալով օփիոիդի ճգնաժամին՝ ԱՄՆ-ի գլխավոր դատախազ և արդարադատության նախարար Ջեֆ Սեշնզը խիստ ուղերձ է հղել օփիոիդ արտադրողներին։
«Օգտագործելով մեր ունեցած բոլոր լծակները՝ ինչպես նաև՝ քաղաքացիական և քրեական օրենսգրքով սահմանված տուգանքների միջոցով մենք պատասխանատվության կենթարկենք օրինազանցներին», – հայտարարել է Սեշնզը:
ԱՄՆ-ի նահանգային ղեկավարությունը նույնպես աշխատում են խնդրի լուծման ուղղությամբ: «Մենք հանդիպում ենք իմ գրասենյակում երկու շաբաթը մեկ, քննարկում ենք կանխարգելմանն ուղղված մեր քայլեր: Մեր ընդունած օրենսդրական բարեփոխումների արդյունքում բժիշկների դուրս գրած դեղատոմսը այսուտհետև ուժի մեջ կլինի ընդամենը յոթ օր և բժիշկները, հատուկ վերապատրաստում անցնելուց հետո, պետք է ամեն օր զեկուցեն դուրս գրված դեղորայքի մասին», – ասում է Ալյասկայի նահանգապետ Բիլ Ուոքերը: Խստացվում են նաև պատժամիջոցները:
«Նախկինում ատամնաբույժն էլ կարող էր OxyContins-ի հաբեր նշանակել, բայց այժմ մեր նահանգում՝ Օհայոյում նման բան չկա: Օրինազանցները զրկվում են իրենց արտոնագրից և քրեորեն հետապնդվում», – ասում է Օհայոյի նահանգապետ Ջոն Քասիչը:
Սեշնզը իր հայտարարության մեջ նաև նշել է, որ ԱՄՆ-ի արդարադատության նախարարությունը արդեն ավելի քան 120 ամբաստանյալների մեղադրանքներ է ներկայացրել օփիոիդների նշանակման և տարածման հետ կապված հանցագործությունների առնչությամբ: Սեշնզը նաև նշել է, որ փակվել է հայտնի «ԱլֆաԲայ» ինտերնետային կայքը, որի միջոցով համացանցում կատարվում էին ամենախոշոր ապորինի գործարքները:
