Քանի՞ միլիոնատեր է Թուրքիայից արտագաղթել 2017թ.

Թուրքիայում գլխավոր ընդդիմադիր ուժ հանդիսացող քեմալական «Ժողովրդահանրապետական» (CHP) կուսակցության պատգամավոր Մուրաթ Բաքանը ներկայացրել է «New World Wealth» խորհրդատվական ընկերության տվյալները, որով հայտնի է դարձել, թե որքան միլիոնատեր է Թուրքիայից արտագաղթել  2017թ.։

Ըստ թուրքական «Diken» պարբերականի՝ վերջին 3  տարվա ընթացքում Թուրքիայից արտագաղթել է 13 հազար միլիոնատեր։ Դրանցից 12 հազարը Թուրքիայի սահմանները լքել են վերջին 2 տարում։

2017թ. միլիոնատերերի արտագաղթի ցուցանիշով Թուրքիան զբաղեցնում էր 5-րդ տեղը։ Ի տարբերություն 2017 թվականի՝  2015 և 2016թթ. Թուրքիայից արտագաղթել էր 6000 միլոնատեր։

Պատգամավորը  տվյալները հրապարակելուց հետո նշել է. «Թուրքիայում, ժողովրդավարության և մարդու իրավունքների խախտման  հետևանքով  աստիճանաբար աճում է ֆինանսական միջոցների  և ինտելեկտուալ հատվածի արտագաղթը երկրից»:

Նա նաև տեղեկացրել է, որ Թուրքիայում կտրուկ բարձրացել է անշարժ գույքի գինը։ Մասնավորապես Ստամբուլում գներն աճել են 8.7 տոկոսով, Բուրսայում՝ 25.9, Անթալիայում՝ 10.1։