Թուրքիայում ազատ է արձակվել գերմանացի լրագրող Դենիզ Յուջելը
Թուրքիայում ավելի քան մեկ տարի կալանքի տակ գտնվող գերմանացի լրագրող, գերմանական Die Welt պարբերականի թղթակից Դենիզ Յուջելին ազատ արձակելու մասին որոշում է կայացվել: Ուշագրավ է, որ թուրքական դատարանը լրագրողին ազատելու մասին որոշում է ընդունել Բեռլինում Գերմանիայի կանցլեր Անգելա Մերկելի հետ Թուրքիայի վարչապետ Բինալի Յըլդըրըմի հանդիպման հաջորդ օրը: Այս մասին հայտնում է թուրքական T24-ը:
Գերմանացի լրագրողը մեղադրվում էր «ժողովրդին թշնամանքի ու ատելության դրդելու», ինչպես նաև «ահաբեկչության քարոզչություն իրականացնելու» մեջ:
Գերմանիայի իշխանությունները բազմիցս հորդորել էին Թուրքիայի իշխանություններին ազատ արձակել իր քաղաքացուն: Խնդրի առնչությամբ Մերկելը մտահոգություն էր հայտնել փետրվարի 15-ին Յըլդըրմի հետ հանդիպման ժամանակ:
