«Թուրքիան կորցրել է հավատը ԱՄՆ նկատմամբ». Թուրքիայի արտգործնախարար
Միացյալ Նահանգների պետքարտուղար Ռեքս Թիլերսոնի՝ Թուրքիա կատարելիք այցին ընդառաջ այդ երկրի արտգործնախարար Մևլութ Չավուշօղլուն հայտարարել է, որ կամ կարգավորելու են հարաբերություններն ԱՄՆ-ի հետ, կամ ամբողջությամբ վատանալու են: Այս մասին հայտնում է թուրքական «Հուրիեթ» պարբերականը:
Նախարարն ընդգծել է, որ իրենք շատ հստակ ու պարզ ակնկալիքներ ունեն ԱՄՆ-ից: «Մեզ արդեն խոստումներ հարկավոր չեն, հստակ քայլեր ենք ցանկանում: Անհրաժեշտ է վերականգնել խարխլված վստահությունը, որպեսզի հնարավոր լինի խոսել որոշ թեմաներով»,- ասել է Չավուշօղլուն:
Նա նշել է, թե ԱՄՆ կողմից իրենք լուրջ սխալներ են նկատել: «Միացյալ Նահանգները չի պահում մեզ տված խոսքերը: Բնական է, որ ինչպես մեր ժողովուրդը, այնպես էլ մենք՝ ղեկավարներս, կորցրել ենք հավատն այդ երկրի նկատմամբ: Խոսքերի փոխարեն հստակ քայլեր ենք ուզելու Թիլերսոնից: Մեր հարաբերությունները կրիտիկական կետի վրա են: Կամ հարաբերությունները կվերականգնվեն, կամ էլ այդ հարաբերություններն ամբողջությամբ կփչանան»,- ասել է Չավուշօղլուն:
ԱՄՆ-ի հետ պաշտոնական Անկարայի հարաբերությունները լարվել էին Թուրքիայում 2016 թվականի ռազմական հեղաշրջման փորձից հետո, երբ ամերիկյան իշխանությունները հրաժարվեցին Թուրքիային հանձնել չափավոր իսլամի քարոզիչ Ֆեթուլլահ Գյուլենին, ում թուրքական կողմը մեղադրում է հեղաշրջման փորձը կազմակերպելու մեջ:
Ավելի ուշ թուրք-ամերիկյան հարաբերությունները լարվեցին Սիրիայում տեղի ունեցող զարգացումների ֆոնին: Թուրքական կողմը իր զայրույթը հայտնեց այն փաստի առնչությամբ, որ ԱՄՆ-ն զինում է Սիրիայի քրդական PYD-ի զինյալներին, որին պաշտոնական Անկարան ահաբեկչական կազմակերպություն է համարում:
