«Նա կշարունակի պահեր ստեղծել, գոլեր խփել և հիանալի խաղալ». Ռունին՝ Մխիթարյանի մասին
Հայաստանի ազգային հավաքականի ավագ Հենրիխ Մխիթարյանի տրանսֆերը շատ քննարկվեց, սակայն Հենրիխի մասին առավել շատ սկսեցին խոսել այն բանից հետո, երբ հայ կիսպաշտպանն առաջին լիարժեք հանդիպումն անցկացրեց «Արսենալի» կազմում: Հիշեցնենք, որ Մխիթարյանն անցկացրեց ամբողջ հանդիպումը՝ 3 անգամ դառնալով գոլային փոխանցման հեղինակ և ճանաչվելով խաղի լավագույն ֆուտբոլիստ:
«Էվերթոնի» հետ խաղից հետո Մխիթարյանի մասին է խոսել նաև Հենրիխի նախկին թիմակից, այժմ՝ «Էվերթոնի» հարձակվող Ուեյն Ռունին: Ռունին նշել է, որ մանչեսթերյան ակումբում Հենրիխն ավելի ճնշված էր գործում, իսկ լոնդոնցիների կազմում ստանում է ազատություն:
«Մխիթարյանն «Արսենալին» շատ համապատասխանող ֆուտբոլիստ է: Նա շատ տաղանդավոր է, ես տեսել եմ նրա մարզումները: Կարծում եմ՝ նա կշարունակի պահեր ստեղծել, գոլեր խփել և հիանալի խաղալ: Նրա մոտ այդ ամենը կստացվի: «Մանչեսթեր Յունայթեդում» Հենրիխին պակասում էր ազատությունը: Նա չէր կարողանում այնպես խաղալ, ինչպես «Բորուսիայում»»,- նշել է Ռունին:
Սիրարփի Աղաբաբյան
