«Ռեալը» հետաքրքրություն է ցուցաբերում «Ռոմայի» դարպասապահի նկատմամբ
«Ռեալը» պլանավորում է 2018-19թթ. մրցաշրջանը սկսել նոր հիմնական դարպասապահով, և մադրիդյան ակումբի հետաքրքրությունների շրջանակում է հայտնվել «Ռոմայի» դարպասապահ Ալիսոն Բեքեր Ռամսեսը: Նման տեղեկությունների է տիրապետում իսպանական Mundo Deportivo պարբերականը:
Միևնույն ժամանակ՝ Մադրիդում չեն կորցնում «Մանչեսթեր Յունայթեդի» դարպասապահ Դավիդ դե Խեայի կամ «Չելսիի» դարպասապահ Տիբո Կուրտուայի հետ պայմանագիր կնքելու հույսը:
Ընթացիկ մրցաշրջանում 25-ամյա Ալիսոնի վստահ խաղը գրավեց մի շարք եվրոպական առաջատար ակումբների ուշադրությունը: Ինչպես հաղորդվել էր, ձմեռային տրանսֆերային պատուհանի ժամանակ հռոմեացիները մերժել են «Լիվերպուլի» առաջարկը: Իտալիայի առաջնության ընթացիկ մրցաշրջանում Ալիսոնն անցկացրել է 22 խաղ և բաց է թողել 17 գնդակ:
Պատրաստեց Անի Գաբուզյանը
