Սաուդյան Արաբիայում միլիարդատերերը փորձում են փողերը դուրս բերել երկրից. Bloomberg
Սաուդյան Արաբիայի միլիոնատերերն ու միլիարդատերերը երկրից իրենց միջոցները դուրս բերելու հնարավորություններ են փնտրում՝ երկյուղելով բացասական հետեւանքներից կոռուպցիոն հետաքննությունների շրջանակում: Այդ մասին հայտնել է Bloomberg գործակալությունը՝ վկայակոչելով իրադրությանը ծանոթ աղբյուրներ:
Աղբյուրների խոսքով՝ երկրի ամենահարուստ մարդիկ բանակցություններ են վարում բանկերի, ակտիվների կառավարման մենեջերների եւ խորհրդատուների հետ՝ նպատակ ունենալով դրամական միջոցները եւ իրացվելի ակտիվները դուրս բերել Սաուդյան Արաբիայից ու հարեւան երկրներից այն երկյուղների պատճառով, որ դրանք կարող են սառեցվել: Բացի այդ, նրանք անհանգստացած են, որ կոռուպցիայի գործի շրջանակներում երկրում նոր ձերբակալություններ կկատարվեն:
Նոյեմբերի 5-ին Սաուդյան Արաբիայի Կոռուպցիայի դեմ պայքարի բարձրագույն կոմիտեն՝ գահաժառանգ արքայազն Մուհամեդ բեն Սալմանի գլխավորությամբ, կարգադրել է ձերբակալել շուրջ 40 ազդեցիկ անձանց, այդ թվում՝ թագավորական ընտանիքի անդամների, նախարարների, զինվորականների ու ձեռնարկատերերի, հաղորդել է ՌԻԱ Նովոստին:
