Կառավարությունը հաստատեց 2017 թվականի ձմեռային զորակոչը կազմակերպելու մասին որոշումը
Գործադիրն այսօրվա նիստի ընթացքում հաստատեց 2017 թվականի ձմեռային զորակոչը կազմակերպելու մասին որոշման նախագիծը:
ՀՀ պաշտպանության նախարար Վիգեն Սարգսյանն ասաց, որ սահմանվում են պարտադիր զինվորական և այլընտրանքային ծառայությունների՝ 2017թ. ձմեռային զորակոչի կազմակերպման ու անցկացման, զորակոչի ապահովման գործընթացում պետական ու տարածքային կառավարման մարմինների գործողությունների հետ կապված հարաբերությունները:
«Ավելացնեմ միայն, որ, քանի որ բավականին մեծ հետաքրքրություն կա մեր համաքաղաքացիների կողմից, Պաշտպանության նախարարությունն ամեն ինչ անելու է, որպեսզի առաջիկայում քառօրյա նիստի ժամանակ օրենքի ընդունման պարագայում հասցնի ներդնել «Ես եմ» ծրագրի մեխանիզմները, ենթաօրենսդրական ակտերը, և ըստ ցանկության՝ առաջնագիծն ընտրող մեր հայրենակիցները կարողանան օգտվել ծառայության այն նոր տեսակից, որն առաջարկել ենք և լայն քննարկումներ ենք անցկացրել»,- ասաց պաշտպանության նախարարը:
