ԱՄՆ-ը ռազմավարական միջուկային ուժերի զինավարժանքներ է սկսում
ԱՄՆ-ը հոկտեմբերի 30-ին սկսում է ռազմավարական միջուկային ուժերի «Գլոբալ որոտ» (Global Thunder) զինավարժանքները, որոնց ընթացքում կմշակվեն գլոբալ հարվածի եւ հակահրթիռային պաշտպանության միջոցների գործողությունները:
Այդ մասին ՌԻԱ Նովոստիին հայտնել է ԱՄՆ-ի Ռազմավարական հրամանատարության (STRATCOM) պաշտոնական ներկայացուցիչ Բրայան Մագուիրը: Նրա խոսքով՝ զինավարժանքների սցենարը «զանազան ռազմավարական սպառնալիքներ է նախատեսում մեր երկրի համար եւ գործի կդնի STRATCOM-ի բոլոր հնարավորությունները» տարբեր վայրերում տեղակայված ստորաբաժանումների մասնակցությամբ իրական ժամանակի ռեժիմով:
Զինավարժանքների ընթացքում կմշակվեն տիեզերական ուժերի, դիտարկման եւ հետախուզման համակարգերի, գլոբալ հարվածի համակարգերի եւ հակահրթիռային պաշտպանության միջոցների հնարավորությունները, ինչպես նաեւ կիբեռհնարավորությունները, հաղորդել է ՌԻԱ Նովոստին:
