«Մենք իրականում ուզում ենք տնտեսական և ինվեստիցիոն ռեգուլյար հարթակ ստեղծել Հայաստանում». Կարեն Կարապետյան
Հաջորդ տարի Հայաստանում կկազմակերպվի միջազգային տնտեսական համաժողով: Այս մասին այսօր կառավարության նիստում հայտարարեց վարչապետ Կարեն Կարապետյանը:
Ըստ նրա` վերջերս կայացած Հայաստան-Սփյուռք համաժողովի ընթացքում ներկայացվել է Հայաստանի տնտեսական ներուժի, աճի վերաբերյալ տեղեկատվություն, սակայն դա պետք է միջազգային տնտեսական կազմակերպություններին և ձեռնարկատերերին հասանելի դարձնել:
Վարչապետը կառավարության աշխատակազմի ղեկավարին հանձնարարեց մեկշաբաթյա ժամկետում համաժողովի կազմակերպման նպատակով ներկայացնել հանձնաժողովի կազմ` փոխվարչապետի գլխավորությամբ:
«Մենք իրականում ուզում ենք տնտեսական և ինվեստիցիոն ռեգուլյար հարթակ ստեղծել Հայաստանի Հանրապետությունում, որտեղ պատմելու ենք ինչպիսի Հայաստան ենք ուզում տեսնել վաղը, ինչպիսի մոտեցումներ կան, նաև ստեղծել հնարավորություն, որ այն նախագծերը, որ իրականացնում ենք և որ ծրագրում ենք, պոտենցիալ ներդրողներին ներկայացնենք»,- ասաց Կ.Կարապետյանը:
