«Ատլետիկոն» առաջարկել է 60 մլն եվրո Դիեգո Կոստայի համար
«Ատլետիկոն» պաշտոնական առաջարկ է արել «Չելսիին» հարձակվող Դիեգո Կոստայի վերաբերյալ:
«Ատլետիկոն» «Չելսիի» հետ պայմանավորվելու ևս մեկ փորձ է կատարել «թոշակառուների» հարձակվող Դիեգո Կոստայի տրանսֆերի վերաբերյալ: Այս անգամ հնդկացիները 60 մլն եվրո են առաջարկել խռովարար ֆուտբոլիստի համար:
Ինչպես հաղորդում է Marca-ն, նախնական համաձայնագրի ստորագրման հնարավորությունը բավականին մեծ է, սակայն պաշտոնապես այն կարող է ձևակերպվել միայն հունվարին, երբ կբացվի տրանսֆերային պատուհանը, և կլրանա մադրիդյան ակումբի վրա դրված նոր ֆուտբոլիստներ ձևակերպելու արգելքը:
Դիեգո Կոստան «Չելսիի» գլխավոր մարզիչ Անտոնիո Կոնտեի հետ վիճաբանության պատճառով կտրականապես հրաժարվեց վերադառնալ Լոնդոն և ամբողջ ամառ անցկացրեց Բրազիլիայում:
Պատրաստեց Անի Գաբուզյանը
