Եվրախորհրդարանում ցանկանում են կենտրոնակայանի նոր շենք կառուցել Բրյուսելում
Եվրախորհրդարանի (ԵԽ) վարչակազմն առաջարկել է քանդել Բրյուսելում վեհաժողովի կենտրոնակայանի գլխավոր շենքերից մեկը՝ դրա տեղում կառուցելով նորը, որի արժեքը նախնական կարգով գնահատվում է 430 միլիոն եվրո: Այդ մասին հայտնել է եվրոպական Politico հրատարակության էլեկտրոնային տարբերակը:
Հրատարակության տվյալներով՝ ԵԽ-ի գլխավոր տնօրեն Կլաուս Վելեն առաջարկությունը հիմնավորում է նրանով, որ Եվրամիության «հիմնադիր-հայրերից» մեկի՝ բելգիացի Պոլ Անրի Սպաակի անվան շենքը, որը կառուցվել է 24 տարի առաջ, չի համապատասխանում անվտանգության արդի եվրոպական ստանդարտներին:
Ինչպես նշում է ՌԻԱ Նովոստին, Ստրասբուրգում Եվրախորհրդարանի շենքի նիստերի դահլիճում, որտեղ կանոնավոր կերպով անցկացվում են վեհաժողովի լիագումար նստաշրջանները, արդեն երկու անգամ փլվել է առաստաղը՝ 2008 թվականի օգոստոսին եւ 2009 թվականի դեկտեմբերին: Փլվելու պահին դահլիճում ոչ ոք չի եղել:
