Հալեպում ՀՀ հյուպատոսն Անկախության տոնի առթիվ այցելել է «Ռադիո Երազ» ռադիոկայան
Հալեպում ՀՀ գլխավոր հյուպատոս Տիգրան Գևորգյանը սեպտեմբերի 20ին այցելեց հայկական «Ռադիո Երազ» ռադիոկայան, որտեղ հարցազրույց տվեց ՀՀ անկախության 25-ամյակի առթիվ: Այս մասին տեղեկացրին ՀՀ արտաքին գործերի նախարարությունից:
Հարցազրույցի ընթացքում գլխավոր հյուպատոսն անդրադարձավ անկախության տարիների ձեռքբերումներին, նոր ընդունված Սահմանադրության հիմնադրույթներին, ինչպես նաև Հայոց ցեղասպանության ճանաչման և դատապարտման ուղղությամբ իրականացվող ջանքերին:
Տիգրան Գևորգյանը, բարձր գնահատելով Հալեպի ճգնաժամային և պատերազմական իրավիճակներում գործող «Ռադիո Երազ»-ի ազգանվեր գործունեությունը, շնորհավորեց ողջ անձնակազմին և հալեպահայությանը գալիք անկախության տոնի կապակցությամբ:
2011 թվականից ի վեր սփռվող «Ռադիո Երազ»-ի գրասենյակը Հալեպում և ամբողջ Սիրիայում միակ հայկական ռադիոկայանն է, որն իր գործունեությունն իրականացնում է երկրում շարունակվող պատերազմի պայմաններում:
