Ռոգոզինը մեկնաբանել է Կիևի կողմից Ադրբեջանի համար «Ան-178» ինքնաթիռների արտադրությունը
Ռուսաստանի փոխվարչապետ Դմիտրի Ռոգոզինը վաղաժամ է համարում պնդելը, թե Ուկրաինայում գործարկված տրանսպորտային «Ան-178» ինքնաթիռների արտադրությունը կդառնա սերիական: Նման կարծիք նա հայտնել է Facebook-ի իր էջում:
«10 ինքնաթիռը սերիական արտադրություն չէ: Ինքնաթիռի մշակման ծախսերը ծածկելու համար անհրաժեշտ է դրանցից հարյուրներով արտադրել»,- գրել է նա՝ մեկնաբանելով «Անտոնով» ձեռնարկության վերագործարկման մասին լուրը:
Ավելի վաղ ԶԼՄ-ները տեղեկություններ էին հաղորդել, թե ուկրաինական «Անտոնով» պետական ձեռնարկությունում սկսվելու է «Ան-178»-երի զանգվածային արտադրություն։
Ձեռնարկության ղեկավար Ալեքսանդր Կոցյուբան հայտարարել է, որ Ադրբեջանը տվել է 10 ինքնաթիռի արտադրության պատվեր:
Ավելի վաղ ուկրաինական «5-րդ ալիքը» հայտնել էր, թե ադրբեջանական ընկերության նախագահն ուկրաինական «Անտոնով» պետական ձեռնարկության հետ կնքել է 10 տրանսպորտային «Ան-178» ինքնաթիռ գնելու մասին պայմանագիր: Նշվում է, որ բանակցությունները տևել են շուրջ 1 տարի: Գործարքի գումարը պահվում է գաղտնի: Հայտնի է, որ ադրբեջանցիներն արդեն կատարել են առաջին կանխավճարը, սակայն այդ մասին տեղեկությունը նույնպես չի հրապարակվում:
Համաձայն հաղորդագրության՝ Ադրբեջանը կստանա ինքնաթիռները 2 փուլով՝ 2 տարվա ընթացքում: Ինքնաթիռները հնարավոր կլինի հավաքել Ադրբեջանի տարածքում:
Ուկրաինական «Ան-178»-ն իրականացրել է իր առաջին թռիչքը 2015թ. մայիսին: Ուկրաինական նոր ինքնաթիռները կարող են թռչել տարբեր եղանակային ու կլիմայական պայմաններում:
