Արմեն Մարտիրոսյանն արդեն ազատության մեջ է
«Ժառանգություն» կուսակցության փոխնախագահ Արմեն Մարտիրոսյանն արդեն ազատության մեջ է: «Արմենպրես»-ի հետ զրույցում լուրը հաստատեց նրա փաստաբան Գիվի Հովհաննիսյանը: «Գրավը վճարվել է ու նա ազատ է արձակվել»,- ասաց փաստաբանը: Նա ազատ է արձակվել 1 միլիոն դրամ գրավի դիմաց:
Արմեն Մարտիրոսյանին առաջադրվել էր մեղադրանք ՀՀ Քրեական օրենսգրքի 225-րդ հոդվածի 1-ին մասով, նա երկու ամիս ժամկետով գտնվում էր կալանավորման մեջ:
Հուլիսի 29-ին Ազատության հրապարակից դեպի Խորենացի փողոց ուղևորված երթը շեղվել էր երթուղուց և Սարի թաղով մոտեցել Պարեկապահակային ծառայության գնդի տարածքին, ուր հսկողություն էին իրականացնում ոստիկանական ուժերը: ՊՊԾ գնդի անվտանգության գոտին ճեղքել փորձող անձանց դեմ ոստիկանությունը հատուկ միջոցներ է կիրառել: Տեղի է ունեցել բախում, ինչի հետևանքով Սարի թաղում ոստիկանությունը հավաքը ցրելու գործողություններ էր իրականացրել, որոնց ընթացքում բազմաթիվ մարդիկ ստացել էին տարբեր աստիճանի մարմնական վնասվածքներ: Երթը գլխավորողներից էր նաև Արմեն Մարտիրոսյանը:
