Գյումրիում քաղաքացու մոտ թմրանյութ է հայտնաբերվել
ՀՀ ոստիկանության Ախուրյանի բաժնի ծառայողներն օգոստոսի 15-ին` ժամը 20.30-ին, թմրանյութ պահելու կասկածանքով, Գյումրի քաղաքի Ժդանովի փողոցի թիվ 18 հասցեի դիմացից բերման են ենթարկել 1968 թ. ծնված, նախկինում 2 անգամ դատապարտված Արսեն Ն.-ին:
Ինչպես տեղեկացրին ՀՀ ոստիկանության հասարակայնության հետ կապերի և լրատվության վարչությունից, խուզարկությամբ նրա մոտ եղած ծխախոտատուփում հայտնաբերվել է երկու գլանակ` լցված յուրահատուկ հոտով կանաչավուն զանգվածով:
Արսեն Ն.-ն հայտարարել է, որ հայտնաբերվածը կանեփից պատրաստված թմրամիջոց է, այն քաղել է Գյումրիի Ստրոմմաշ թաղամասի մոտերքից, չորացրել և մանրացրել է հետագայում ծխելու միջոցով օգտագործելու համար:
Նշանակվել է դատաքիմիական փորձաքննություն:
Կատարվում է հետաքննություն:
