Ֆիդել Կաստրոն իր 90-ամյակի առթիվ հայտնվել է հանրության առաջ
Կուբայի նախկին առաջնորդ Ֆիդել Կաստրոն, ով վերջին տարիներին չափազանց քիչ է երևում հանրությանը, մասնակցել է իր 90-ամյակին նվիրված միջոցառմանը:
Հոբելյանական միջոցառումն անցկացվել է Հավանայի Կառլ Մարքսի անվան թատրոնում, որտեղ Ֆիդել Կաստրոն ժամանել է իր եղբոր՝ Ռաուլ Կաստրոյի, որը ներկայումս Կուբայի նախագահն է և Վենեսուելայի նախագահ Նիկոլաս Մադուրոյի ընկերակցությամբ:
Արարողության ժամանակ կոմանդանտեն վեր չի կացել իր աթոռից և ընդհանուր առմամբ հիվանդագին տեսք է ունեցել, հայտնում է BBC-ն:
Թատրոնի ներկայացումը նվիրված է եղել Ֆիդել Կաստրոյի կենսագրության նշանակալի հատվածներին և Կուբայի հեղափոխությանը:
Տոնակատարությունն այնուհետ շարունակվել է Հավանայի փողոցներում և ավարտվել տոնական հրավառությամբ:
Նախորդ անգամ Կաստրոն հանրության առաջ երևացել էր այս տարվա ապրիլին:
