Ֆրանսիան և Գերմանիան դատապարտել են Պակիստանում տեղի ունեցած ահաբեկչությունը
Ֆրանսիայի նախագահ Ֆրանսուա Օլանդը դատապարտել է ահաբեկիչների կողմից իրականացված «զզվելի ակտը», որը տեղի է ունեցել օգոստոսի 8-ին Պակիստանի Քվետա քաղաքում: Ինչպես հաղորդում է «ՏԱՍՍ» գործակալությանը, այս մասին ասված է Ելիսեյան պալատի հայտարարությունում: «Ֆրանսիայի նախագահը դատապարտում է զզվելի ակտը և հայտնում Ֆրանսիայի համերաշխությունը Պակիստանի ժողովրդին, որը մարտ ամսին արդեն բախվել է ծանր փորձության Լախոր քաղաքում տեղի ունեցած ահաբեկչության ժամանակ»,ասված է հայտարարությունում:
Գերմանիայի ԱԳՆ-ն ևս դատապարտել է Քվետա քաղաքում տեղի ունեցած ահաբեկչությունը: Այս մասին ասվում է Գերմանիայի ԱԳՆ-ի տարածած հաղորդագրությունում:
«Մենք խստորեն դատապարտում ենք անմարդկային գործողությունը: Մենք խորը ցավակցություն ենք հայտնում զոհվածների ընտանքիներին, ինչպես նաև Պակիստանի ամբողջ ժողովրդին»,- նշված է հայտարարության մեջ:
Գերմանիայի ԱԳՆ-ն ահաբեկչության դեմ պայքարի գործընթացում իր աջակցությունն է հայտնել Պակիստանին:
Առնվազն 97 մարդ է զոհվել Պակիստանի Քվետա քաղաքի (Բելուջստանի նահանգ, որը գտնվում է երկրի հարավարեւմուտքում) հիվանդանոցներից մեկում իրականացված պայթյունի հետեւանքով: Ահաբեկչական գործողության գրեթե բոլոր զոհերը փաստաբաններ ու լրագրողներ են, որոնք հավաքվել էին հոսպիտալի վերականգնողական բաժանմունքում՝ հարգելու Բելուջստանի փաստաբանների ասոցիացիայի նախագահ Բիլալ Անվար Քազիի հիշատակը, որն սպանվել է օգոստոսի 8-ի առավոտյան:
