Յունկերը կարծում է, որ Թուրքիան պատրաստ չէ դառնալ ԵՄ անդամ
Եվրոպական հանձնաժողովի նախագահ Ժան-Կլոդ Յունկերը հայտարարել է, որ Թուրքիան դեռևս պատրաստ չէ դառնալ Եվրամիության անդամ: «Թուրքիան այն վիճակում է, որում այժմ գտնվում է. նա չի կարող դառնալ Եվրոպական միության անդամ: Առաջին հերթին այն դեպքում, երբ նա կանի այն, ինչի մասին խոսում են ոմանք` կրկին կսահմանի մահապատիժ: Դա կբերի բանակցությունների կտրուկ դադարեցման»,- ARD հեռուստաընկերությանը տված հարցազրույցում նշել է Յունկերը:
Նրա խոսքով` բանակցությունների դադարեցման համար անհրաժեշտ է ԵՄ բոլոր անդամների համաձայնությունը, ինչը ներկա դրությամբ չի նկատվում:
Յունկերն ընդգծել է, որ ԵՄ-ն պաշտոնական Անկարայից սպասում է բոլոր անհրաժեշտ նախապայմանների կատարում: «ԵՄ-ն պնդում է իր դիրքորոշումը և չի կարող հրաժարվել իր գաղափարներից` մարդու իրավունքների պաշտպանության և հակաահաբեկչական օրենքի հարցերում»,- ասել է Յունկերը:
