Միլոշ Զեմանը Եվրոպայում ահաբեկչություններ է կանխատեսում
Չեխիայի նախագահ Միլոշ Զեմանը չի բացառում Եվրամիության տարածքում ահաբեկչությունների հնարավոր շարունակությունը: Չեխական Blesk թերթին տված հարցազրույցում նա կոչ է արել վճռական միջոցառումներ ձեռնարկել իսլամիստ ահաբեկիչների և անօրինական միգրացիայի դեմ, հայտնում է TASS-ը:
«Եթե Եվրոպա ներթափանցի ավելի քան 1 միլիոն փախստական, ապա նրանց թվում կլինեն ջիհադիստներ»,- ընդգծել է նա:
Նրա խոսքով՝ Եվրոպայում գործում է 15 հազարից ոչ պակաս իսլամիստ ահաբեկիչ:
«Անհրաժեշտ է որոնել միգրացիոն ալիքի խնդրի լուծումը: Ես դա այլ կերպ չեմ անվանում, քան կազմակերպված ներխուժում: Անհրաժեշտ է արտաքսել բոլոր փախստականներին, որոնք ապաստան չեն ստացել ԵՄ-ում»,- կարծում է Չեխիայի նախագահը՝ կոչ անելով դադարեցնել ԵՄ սահմաններից դուրս իսլամիստներին ուղղվող ֆինանսական հոսքերը:
