Թուրքիայում առողջապահության ոլորտի հինգ հազար աշխատակից ազատվել է աշխատանքից
Թուրքիայի առողջապահության նախարարության շուրջ հինգ հազար աշխատակիցներ հեռացվել են աշխատանքից՝ երկրում հեղափոխության փորձի հետաքննության շրջանակում: Ինչպես հաղորդում է Anadolu գործակալությունը, այդ մասին տեղեկացրել է Թուրքիայի առողջապահության նախարար Ռեջեփ Ակդագը:
«Հինգ օրվա ընթացքում նախարարությունում ինտենսիվորեն աշխատում է հանձնաժողովը՝ իմ մասնակցությամբ: Աշխատանքից ազատվել է հինգ հազար մարդ»,- ասել է Ակդագը: Հուլիսի 16-ի գիշերը Թուրքիայում տեղի է ունեցել հեղափոխության փորձ, որը կանխվել է իշխանությունների կողմից: Համաձայն վերջին տվյալների՝ դիմակայության հետևանքով Ստամբուլում և Անկարայում զոհվել է 246 մարդ, ավելի քան երկու հազարը ստացել են մարմնական տարբեր աստիճանի վնասվածքներ:
