ԵԱՏՄ-ում քննարկվել են միասնական թվային տարածության ստեղծման հեռանկարները
Եվրասիական տնտեսական հանձնաժողովում կայացել են ԵԱՏՄ տարածքում միասնական թվային տարածության ստեղծմանը նվիրված առաջին քննարկումները: Ինչպես «Արմենպրես»-ին տեղեկացրին հանձնաժողովի մամուլի ծառայությունից, նշված հարցով Հանձնաժողովի աշխատանքային խումբը ձևավորվել է ներքին շուկաների, ինֆորմատիզացիայի և հաղորդակցականտեղեկատվական հարցերով ԵԱՏՄ կոլեգիայի անդամ, նախարար Կարինե Մինասյանի գլխավորությամբ:
Հանձնաժողովի կազմում ընդգրկվել են ԵԱՏՄ անդամ երկրների համապատասխան պետական գերատեսչությունների, բիզնես կառույցների, գիտականհամալսարանական շրջանակների, ինչպես նաև Հանձնաժողովի ներկայացուցիչներ:
«Մենք պետք է 10-15 տարի առաջ նայենք: Միության թվային տարածությունը ԵԱՏՄ նպատակների իրականացման համար նոր հնարավորություններ է ստեղծում», նշել է Կարինե Մինասյանը: Նա նաև ընդգծել է, որ միության թվային տարածության ձևավորումը կարող է դառնալ եվրասիական ինտեգրացիոն գործընթացների խորացման և առկա խոչընդոտների վերացման բանալին:
ԵԱՏՄ միասնական թվային տարածքի ստեղծման հիմնական ուղղություններն են ինտեգրացիոն գործընթացների թվային արդիականացումը, թվային շուկաների ստեղծումը, թվային ենթակառուցվածքների և ակտիվների ձևավորումը, թվային տնտեսության անցման համար անհրաժեշտ ցանցերի և կենտրոնների ձևավորումը:
