Գագիկ Ջհանգիրյանն առաջարկում է կրճատման ենթակա մեքենաները տրամադրել օպերատիվ քննիչներին
«Ինձ թվում է բյուջեի կատարողականի քննարկումները շատ ձանձրալի են, ում ինչքան էլ փող տաք` կծախսեն: Մնում է Ջանջուղազյանը հավաքի»,- այսօր ԱԺ պետական-իրավական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում 2015թ. բյուջեի կատարողականի քննարկումների ժամանակ հայտարարեց ՀԱԿ պատգամավոր Գագիկ Ջհանգիրյանը:
Նա ՀՀ կառավարության աշխատակազմի ղեկավար-նախարար Դավիթ Հարությունյանից հետաքրքրվեց, թե արդյոք դատական համակարգից պահանջո՞ւմ են որակական ցուցանիշներ ներկայացնել:
Դ.Հարությունյանը բացասական պատասխան տվեց և նշեց, որ միայն վերլուծում են դատակա նիստերի քանակն ու հետաձգման պատճառները:
Գ.Ջհանգիրյանն առաջարկեց կառավարության ծառայողական մեքենաներից ոչ մեկը չկրճատել, սակայն կրճատման ենթակա մեքենաները տրամադրել օպերատիվ քննիչներին, որոնք ամենաշատը կարիք ունենա մեքենաների և հաճախ իրենք են հոգում դրանց ծախսը:
Դ.Հարությունյանը պատասխանեց, որ բարելավումները միշտ չէ, որ կապված են բյուջեի հետ: Ըստ նրա` շատ հաճախ մեքենաներն ուղղակի ամրակցված չեն որևէ պաշտոնյայի, և սպասարկում են նախարարությանը:
