Լաթաքիայում ահաբեկչության զոհերի թիվը գերազանցել է 120-ը
Սիրիայի Ջաբլա և Տարտուս քաղաքներում՝ ռուսական ռազմաբազաների հարևանությամբ տեղի ունեցած պայթյունների հետևանքով զոհերի թիվը գերազանցել է 120-ը, հայտնում է BBC-ն՝ հղում կատարելով իր աղբյուրներին:
Ավելի վաղ ԶԼՄ-ները հայտնել էին, որ պայթյունների հետևանքով երկու քաղաքներում սպանվել է նվազագույնը 78 մարդ:
Սիրիայի պետական հեռուստաալիքների տվյալով՝ երեկ 3 պայթյուն որոտացել էր Ջեբլայի բազմամարդ ավտոկայարանում, այնուհետև մահապարտ ահաբեկիչն իրեն պայթեցրել էր տեղի հոսպիտալի մուտքի մոտ: Միաժամանակ, նավահանգստային Տարտուս քաղաքում՝ ավտոկայարանի մոտ, պայթեցվել էր ականապատ մեքենա:
Եվս երկու մահապարտ ահաբեկիչ մուտք էին գործել կայարան և պայթեցրել իրենց:
Երկու քաղաքներն էլ գտնվում են Լաթաքիա նահանգում՝ Սիրիայի նախագահ Բաշար Ասադի վերահսկողության տակ գտնվող քաղաքներում: Նման մասշտաբի հարձակումներ այդ շրջանում հազվադեպ են տեղի ունենում:
