Հունաստանը հավանություն է տվել տնտեսական կոշտ միջոցառումներին
Հունաստանի խորհրդարանը հավանություն է տվել տնտեսության հավելյալ միջոցառումներին, որոնք նախատեսում են ծախսերի կրճատում և հարկերի բարձրացում, ինչը թույլ կտա երկրին միջազգային վարկատուներից ստանալ 5,4 միլիարդ դոլարի հերթական տրանշը: Այս մասին հայտնում է BBC-ն:
Մայիսի 24-ին եվրոգոտու ֆինանսների նախարարները պետք է համաձայնեցնեն Հունաստանին հերթական տրանշի տրամադրման հարցը:
Օրենքի նախագծի օգտին քվեարկել է իշխող ձախարմատական «Սիրիզա» կոալիցիայի և աջ «Անկախ հույներ» կուսակցության 153 պատգամավոր, դեմ՝ 145-ը:
Հունաստանի վարչապետ Ալեքսիս Ցիպրասը կիրակի հայտարարել է, որ երկիրը, հավանության արժանացնելով տնտեսության նոր միջոցառումներին, իրականացրել է իր միջազգային պարտավորությունները: «Հիմա հերթը եվրոպացի առաջնորդներինն է»,- ասել է նա AFP-ին տված հարցազրույցում:
Հունաստանն անցած տարի Եվրամիության 86 մլրդ եվրոյի չափով ֆինանսական օգնության դիմաց համաձայնել է կատարել մի շարք բարեփոխումներ, որոնց թվում են կենսաթոշակային տարիքի բարձրացումը, հարկերի ավելացումն ու ծախսերի կրճատումը:
