Թուրքիան «մեկ մարդու պետության» ստեղծման ճանապարհին է. Մարտին Շուլց
Եվրոպական խորհրդարանի նախագահ Մարտին Շուլցի կարծիքով՝ Թուրքիայի նախագահ Ռեջեփ Թայիփ Էրդողանը անհնար է դարձնում ԵՄ-ին երկրի անդամակցության բանակցությունները:
Նա խիստ քննադատության է ենթարկել Անկարայի գործողությունները Գերմանիայի կանցլեր Անգելա Մերկելի և Էրդողանի հանդիպման նախօրեին: Շուլցի կարծիքով՝ Թուրքիայում դիտվում է «եվրոպական արժեքներից կտրուկ հեռացում»:
«Կանցլերը, ինչպես նաև եվրոպական մյուս կառավարությունների ղեկավարները պետք է հստակ ասեն Թուրքիայի նախագահին, որ նրա քաղաքականությունը չի համապատասխանում եվրոպական բազային արժեքներին, ու որ այդկերպ այն չի նպաստում ԵՄ-ին Թուրքիայի անդամակցության բանակցություններին»,- ասել է Շուլցը Kölner Stadt-Anzeiger թերթին այսօր տված հարցազրույցում:
Այսօր նախանշված է Մերկելի և Էրդողանի հանդիպումը ԵՄ-ի և Թուրքիայի միջև «փախստականների մասին պակտի» առնչությամբ: Միաժամանակ, ենթադրվում է, որ Մերկելը կանդրադառնա նաև թուրք պատգամավորներին անձեռնմխելիությունից զրկելու ու նրանց քրեական պատասխանատվության ենթարկելու մասին որոշմանը: Փորձագետների կարծիքով՝ դա, առաջին հերթին, վերաբերելու է քուրդ քաղաքական գործիչներին:
Շուլցը նաև կարծում է, որ Թուրքիան գտնվում է «մեկ մարդու պետության» ստեղծման ճանապարհին՝ Էրդողանի ղեկավարությամբ:
Եվրոպական խորհրդարանի նախագահի կարծիքով՝ առկա է «քաղաքական անհամաչափ ճնշման կոմբինացիա, որին ենթարկվելով խորհրդարանն ընդունել է պատգամավորներին անձեռնմխելիությունից զրկելու որոշումը, ինչպես նաև կատարվել է նախկին վարչապետի ինքնահեռացումը»:
