Ավստրիան ուժեղացնում է հսկողությունը Իտալիայի հետ սահմանին
Ավստրիան որոշել է ավելացնել ոստիկանների թիվը Իտալիայի հետ սահմանային «Բրեններ» անցակետում, որպեսզի զսպի անօրինական ներգաղթյալների հոսքը: Այս մասին հայտարարել է Ավստրիայի ներքին գործերի նախարար Վոլֆգանգ Սոբոտկան, հայտնում է Reuters-ը:
«Ներգաղթյալները ներթափանցում են «Բրեններով»՝ երբեմն 5, 7 կամ 10 մարդով, այդ իսկ պատճառով ստիպված համապատասխան միջոցներ ձեռնարկեցինք շրջանում: Այսպես, 30 իրավապահ Տիրոլի շրջանից ու 50 սպա երկրի մյուս մասից կսկսեն ինտենսիվ որոնումները»,- ասել է Սոբոտկան: Նրա խոսքով՝ մարդկանց արդեն սկսել են ստուգել շրջանի գնացքներում, ավտոբուսներում և ավտոմեքենաներում:
Նախարարը հայտնել է, որ ուժեղացված միջոցառումները ոչ մի կերպ կապված չեն երկրում ընթացող նախագահական ընտրությունների հետ, որտեղ հաղթելու մեծ շանսեր ունի ուլտրաաջ «Ազատություն» կուսակցության թեկնածուն:
