ԱՄՆ-ի Պետքարտուղարության մեկնաբանությունը՝ Թուրքիայում հայազգի պատգամավորի հետ կապված միջադեպի կապակցությամբ
Միացյալ Նահանգները դատապարտում է ոտնձգության եւ բռնության ցանկացած դրսեւորում, հայտարարել է ԱՄՆ-ի Պետքարտուղարության փոխխոսնակ Մարք Թոները՝ մեկնաբանելով Թուրքիայի խորհրդարանում տեղի ունեցած ծեծկռտուքը: Այս մասին հաղորդում է «Ամերիկայի ձայնը»:
«Մենք մտահոգված ենք քաղաքական ոտնձգությունների ցանկացած դրսեւորումով, որը պարունակում է բռնություն որեւէ անձի դեմ», – հայտարարել է Թոները:
Հիշեցնենք, որ Թուրքիայի խորհրդարանի հայազգի պատգամավոր Կարո Փայլյանը Ֆեյսբուքի իր էջում հայտարարություն էր տարածել, ըստ որիԹուրքիայի խորհրդարանի անդամներն իր վրա են հարձակվել ազգայնական դրդապատճառներով: Պետքարտուղարության ներկայացուցիչը բավարար մանրամասների չէր տիրապետում տվյալ դեպքը մեկնաբանելու համար, սակայն հայտարարեց.
«Անշուշտ, մեզ համար մտահոգիչ են ցանկացած քաղաքական կուսակցության անդամի դեմ ոտնձգությունները կամ բռնությունը»:
Թուրքիայի խորհրդարանում հայազգի պատգամավորի հետ տեղի ունեցած միջադեպի կապակցությամբ Ամերիկայի Հայ դատի հանձնախումբը դիմել է ժողովրդավարության, մարդու իրավունքների եւ աշխատանքի հարցերով ԱՄՆ-ի Պետքարտուղարի օգնականին, ինչպես նաեւ «Amnesty International» եւ «Human Rights Watch» միջազգային իրավապաշտպան կազմակերպություններին: Ավելի վաղ, հանձնախումբը դիմել էր Թուրքիայում Միացյալ Նահանգների դեսպանին՝ կոչ անելով նրան դատապարտել տեղի ունեցածը:
