Ռոման Ամոյանը մեկնում է Թուրքիա՝ օլիմպիական ուղեգրի հետևից
Ստամբուլում մայիսի 6-8-ը կայանալու է Օլիմպիական խաղերի ըմբշամարտի վարկանիշային մրցաշար, որին մասնակցելու է Հայաստանի ներկայացուցիչ Ռոման Ամոյանը:
Հունահռոմեական ոճի 59 կգ քաշային ըմբիշ Ամոյանը միայնակ կլինի Ստամբուլի մրցաշարում, քանի որ 130 կգ քաշային կարգում Հայաստանը ներկայացուցիչ չի ունենա:
Օլիմպիական ուղեգրի համար պայքարող Ամոյանի հետ մրցավայր են մեկնելու նաև Հայաստանի հունահռոմեական ոճի ըմբշամարտի հավաքականի մարզիչներ Սամվել Գևորգյանը և Էդուարդ Սահակյանը: Ստամբուլի մրցաշարը վերջին փորձը կլինի Ամոյանի համար ի վերջո օլիմպիական խաղերի ուղեգիր նվաճելու համար:
Այս պահին Հայաստանի հունահռոմեական ոճի ըմբշամարտի հավաքականը օլիմպիական խաղերի 4 ուղեգիր ունի, որոնք նվաճել են 66 կգ քաշային Միհրան Հարությունյանը, 75 կգ քաշային Արսեն Ջուլֆալակյանը, 85 կգ քաշային Մաքսիմ Մանուկյանը և 98 կգ քաշային Արթուր Ալեքսանյանը:
