ՀՀԿ-ում լինելու է արտաքին կապերի հանձնաժողով
ՀՀԿ-ն որոշում է կայացրել կուսակցության կառուցվածքում ստեղծել արտաքին կապերի նոր հանձնաժողով: Այս մասին այսօր լրագրողների հետ հանդիպման ժամանակ հայտնեց ՀՀԿ փոխնախագահ Արմեն Աշոտյանը՝ խոսելով ՀՀԿ նոր ծրագրի մասին: Նրա խոսքով՝ կապերն այնքան են ընդլայնվել և խորացել, որ կարիք կա ոչ միայն՝ անձնական, այլև՝ ինստիտուցիոնալ մակարդակով համակարգել կուսակցության գործունեությունը տարբեր միջազգային կառույցներում:
Նրա խոսքով՝ այս հանձնաժողովի հիմնական գործառույթը լինելու է կուսակցական ներկայացուցիչների՝ ինչպես՝ երիտասարդական, կանանց կառույցների, այնպես էլ՝ խորհրդարանական համաժողովներում ՀՀԿ անդամ կամ ՀՀԿ խմբակցություն ներգրավված անդամների հետ համատեղ աշխատանքը, հատկապես եվրոպական և միջազգային խորհրդարանական համաժողովներում, որտեղ կան ֆրակցիաներ:
«Այսինքն՝ մենք աշխատում ենք այնտեղ, այն միջազգային համաժողովներում, որտեղ կան առանձին ֆրակցիաներ: Խնդիրը չի սահմանափակվելու բացառապես կուսակցական խորհրդով, այլ նաև առաջ են գնալու երիտասարդական և կանանց կառույցների նախաձեռնություններով: Գիտեք, որ դրսում աշխատող եվրոպական կուսակցությունները շատ մեծ դեր են տալիս այդ կառույցներին: Կուսակցությունների հետագա հզորացման համար շատ կարևոր է ներգրավել ինչպես՝ կանանց, այնպես էլ՝ երիտասարդներին»:
