ԱՄՆ-ը հրամայել է Թուրքիայից դուրս բերել դիվանագետների ու զինվորականների ընտանիքները
ԱՄՆ-ի իշխանությունները հրամայել են զինվորականների ու դիվանագետների ընտանիքներին լքել Թուրքիայի հարավը անվտանգության հնարավոր սպառնալիքների պատճառով: Նրանց հրամայված է հեռանալ Ադանայից, Իզմիրից ու Մուղլայից, հայտնում է BBC-ն:
Շուրջ 5000 ամերիկացի զինվորական ու նրանց ընտանիքների անդամները գտնվում են Ադանայի «Ինջիրլիք» ավիաբազայի շրջանում, որտեղից ԱՄՆ-ը ավիահարվածներ է հասցնում ԴԱԻՇ-ի զինյալներին:
Անցած տարի անվտանգության նկատառումներից ելնելով պաշտոնյաներն արգելել էին ամերիկացի զինվորականներին ու նրանց ընտանիքներին հայտնվել բազայի դարպասների մոտ տեղակայված շուկաներում ու ռեստորաններում: 2 ամիս առաջ ընտանիքներին առաջարկվել էր ինքնակամ տարհանում, սակայն քչերն էին հեռացել ավիաբազայից:
Ներկայում ամերիկացի զինվորականների հարազատները պարտավոր են լքել «Ինջիրլիքը»:
ԱՄՆ Պետդեպարտամենտը հայտնել է, որ հրամայել է նաև երկրից դուրս բերել Ադանայում ԱՄՆ հյուպատոսության աշխատակիցների հարազատներին, ինչպես նաև Իզմիրում ու Մուղլայում ամերիկացի պաշտոնյաների ընտանիքի անդամներին:
