Բրյուսելի օդանավակայանն իր աշխատանքը կվերսկսի մարտի 29-ից ոչ շուտ
Բրյուսելի միջազգային օդանավակայանը, որը փակվել էր մարտի 22-ի ահաբեկչություններից հետո, կվերսկսի ուղևորներին ընդունել մարտի 29-ից ոչ շուտ: Այս մասին հայտնում է TASS-ը՝ հղում կատարելով օդանավակայանի ադմինիստրացիային:
«Ուղևորատար թռիչքները Բրյուսելի օդանավակայանից կվերսկսվեն ոչ վաղ, քան երեքշաբթի՝ մարտի 29-ին»,- ասվում է հաղորդագրության մեջ:
Բրյուսելի «Զավենտեմ» օդանավակայանը փակվել էր որոտացած 2 պայթյուններից անմիջապես հետո: Ուրբաթ օրը օդանավակայանի տարածք թույլատրել էին մուտք գործել ավտոմեքենաների տերերին, որոնք մեքենաներն ահաբեկչության օրը կայանել էին կայանատեղիում: Աստիճանաբար ուղևորներին են վերադարձնում նրանց ուղեբեռները: Օդանավակայանի շենքը նախկինի պես անհասանելի է կողմնակի անձանց համար:
Հիշեցնենք, որ Բրյուսելի ահաբեկչությունները խլել են 31 մարդու կյանք, մոտ 270 մարդ ստացել էր վնասվածք:
