Մոսկվայի «Շերեմետևո» օդանավակայանում անվտանգությունն ուժեղացվել է
Մոսկվայի «Շերեմետևո» օդանավակայանում անվտանգությունն ուժեղացվել է: Համապատասխան որոշումը կայացվել է այն բանից հետո, երբ Բրյուսելի օդանավակայանում պայթյուններ են որոտացել, հայտնում է LifeNews-ը: Նման որոշում կայացնելու պատճառն այն է, որ «Շերեմետևոն» ուղիղ ավիահաղորդակցություն ունի Բրյուսելի հետ:
Հիշեցնենք, որ այսօր մի շարք ահաբեկչություններ են տեղի ունեցել Բելգիայի մայրաքաղաքում: Առավոտյան երկու պայթյուն է որոտացել Բրյուսելի միջազգային օդանավակայանում տեղի ժամանակով ժ. 08.00-ին:
Վերջին տեղեկությունների համաձայն՝ օդանավակայանում պայթյուններին զոհ է գնացել 23 մարդ: Բրյուսելի օդանավակայանում պայթյունները պաշտոնապես ահաբեկչություն են որակվել:
Եվս 4 պայթյուն է որոտացել Բրյուսելի եվրոպական թաղամասում գտնվող մետրոյի Մալբեկ ու Շուման կայարաններում: Իշխանությունները հայտարարել են, որ մետրոյի բոլոր կայարանները փակ են:
Daily Mail-ի փոխանցմամբ՝ Բրյուսելի մետրոյի Մալբեկ կայարանում պայթյունի հետևանքով զոհերի թիվը հասել է 10-ի: Բրյուսելում ներկայում փակվում են դպրոցները, մանկապարտեզները, հայտարարվել է ահաբեկչական սպառնալիքի բարձր մակարդակ, հայտնում են բելգիական լրատվամիջոցները:
