Դոնի Ռոստովի օդանավակայանի թռիչքուղին վերականգվել է «Բոինգ-737»-ի կործանումից հետո
Դոնի Ռոստովի օդանավակայանի թռիչքուղին վերականգվել է ուղևորատար «Բոինգ-737» ինքնաթիռի կործանումից հետո, հայտնում է Interfax-ը՝ հղում կատարելով Ռուսաստանի արտակարգ իրավիճակների ծառայությանը:
«Վերականգնման աշխատանքներն ամբողջությամբ ավարտվել են»,- ասել է գերատեսչության ներկայացուցիչը գործակալության հետ զրույցում:
Հիշեցնենք, որ շաբաթ՝ Մոսկվայի ժամանակով ժ. 3:50-ին Դուբայից Դոնի Ռոստով ուղևորվող Flydubai ավիաընկերության «Բոինգ-737-800» ինքնաթիռը կործանվել է: Մոտավորապես 100-200 մետր բարձրությունից օդանավը մեծ արագությամբ ու գրեթե ուղիղ անկյամբ բախվել է գետնին: Ինքնաթիռում գտնվող 55 ուղևորներից 50-ը եղել են ռուսներ: Ինքնաթիռում եղել է անձնակազմի 7 անդամ, ընդհանուր՝ 62 մարդ:
Դեպքի առնչությամբ հարուցվել է քրեական գործ: Աշխատանքները աղետի վայրում շարունակվում են: Ռուսաստանի Դաշնության Քննչական կոմիտեն հայտարարել է, որ դիտարկում է աղետի երեք հիմնական վարկած՝ տեխնիկական անսարքությունը, եղանակային վատ պայմաններն ու անձնակազմի սխալը:
Միջպետական ավիացիոն կոմիտեն հայտարարել է, որ ինքնաթիռի բորտային ինքնագրիչները ուժեղ վնասված են, սակայն պիտանի են վերծանման համար:
