Կառավարությունը տեղափոխեց աշխատանքային օրը
ՀՀ կառավարության այսօրվա որոշմամբ՝ մարտի 28-ի աշխատանքային օրը տեղափոխվեց ապրիլի 2-ին: Նիստի ընթացքում նախագիծը ներկայացրեց ՀՀ կառավարության աշխատակազմի ղեկավար-նախարար Դավիթ Հարությունյանը:
Նախագծի հիմնավորման մեջ նշված է, որ դրա ընդունումը նպատակ ունի հնարավորություն ընձեռնել Հայաստանի քաղաքացիներին` Սբ. Հարության տոնի` մարտի 27-ին հաջորդող հիշատակի օրն այցելելու իրենց ննջեցյալների գերեզմանները: Որոշման նախագծի ընդունումը բխում է «Հայաստանի Հանրապետության տոների և հիշատակի օրերի մասին» օրենքի 19-րդ հոդվածից ու «Խղճի ազատության և կրոնական կազմակերպությունների մասին» օրենքի 17-րդ հոդվածից:
Դավիթ Հարությունյանն ասաց նաև, որ վարչապետի հանձնարարությամբ սկսված աշխատանքները ընթացքում են, «Տոների և հիշատակի օրերի մասին» օրենքում փոփոխությունները նախապատրաստված են և շուտով կներկայացվեն գերատեսչություններին.
«Երկու խոսքով կարող եմ ասել. բուն գաղափարն այն է, որ մենք վերանայում ենք տոները: Որոշ տոներ, որոնք սկզբունքորեն մեր անցյալում եղել են ոչ աշխատանքային օրեր, պատրաստ ենք փոխարինել, դարձնել աշխատանքային օրեր, իսկ որոշ նոր տոներ առաջարկելու ենք դարձնել ոչ աշխատանքային:
Նպատակը նաև այն է, որ տարվա ընթացքում մարդիկ ունենան երկու անգամ ավելի երկար, ինչպես ասում են շաբաթվա վերջ՝ long weekend կոչվածը: Այս փոփոխության հաշվին մենք երկու անգամ կունենանք դեպք, երբ ուրբաթ և երկուշաբթի օրերը կլինեն ոչ աշխատանքային»,-առաջիկա փոփոխությունները սեղմ ներկայացրեց Դ. Հարությունյանը:
