ԱՄՆ-ը համատեղ զորավարժություններ կանցկացնի Վրաստանի հետ
Ամերիկացի զինծառայողները մայիսին Վրաստանի Զինված ուժերի հետ դարձյալ զորավարժություններ կանցկացնեն, որոնք կկոչվեն Noble Partner («Վեհանձն գործընկեր»), որոնք, ինչպես անցած տարի, այս տարի ևս տեղի կունենան Վրաստանի տարածքում: Այս մասին Defence News շաբաթաթերթին հայտնել է ԱՄՆ ցամաքային զորքերի հրամանատար, գեներալ-լեյտենանտ Բեն Հոջեսը:
«Այդ զորավարժություններն ուղղված են Վրաստանի ազգային պաշտպանության ամրապնդմանը: Մենք դրանց մասնակցելու նպատակով կուղարկենք տանկային վաշտ, որը տրանսպորտային նավով կուղարկվի Սև ծովով, ինչպես նաև օդադեսանտային վաշտ, որը կուղարկվի օդով: Մեր զինծառայողները կգտնվեն վրացական գումարտակի հրամանատարության ներքո»,- հայտնել է ամերիկացի հրամանատարը:
Հոջեսը հայտնել է, որ այս տարվա մայիսին ամերիկացի զինծառայողները նաև կմասնակցեն Թուրքիայի ռազմական մանևրներին, իսկ հունիսին՝ Լեհաստանի ու Գերմանիայի տարածքներում անցկացվող զորավարժություններին:
Աշնանը կանցկացվեն ՆԱՏՕ-ի անդամ երկրների համատեղ զորավարժություններ Ռումինիայում ու Բուլղարիայում: Վերջինս հայտնել է նաև, որ ԱՄՆ ցամաքային զորքերը Եվրոպայում ծրագրում են նաև կապեր զարգացնել Ալբանիայի, Չեռնոգորիայի, Սերբիայի և Մոլդովայի զինված ուժերի հետ:
ԱՄՆ նախագահ Բարաք Օբամայի ադմինիստրացիան 2017թ. ֆինանսական տարում Կոնգրեսից այդ նպատակների համար խնդրել է 3,4 մլրդ դոլար, ինչը քառակի ավելի է, քան այս տարում պահանջվել է:
