Emirates Airline-ի Airbus 380 ինքնաթիռն իրականացրել է ռեկորդային թռիչք
Emirates Airline ավիաընկերության A380 ինքնաթիռը իրականացրել է ամենաերկար՝ առանց վայրէջքի կոմերցիոն թռիչքը, հայտնում է BBC-ն:
Ինքնաթիռը հատել է մոտ 14,2 հազար կմ՝ Դուբայից Օկլենդ (Նոր Զելանդիա) հասնելով 17 ժամ 15 րոպեում: Առաջին՝ Դուբայ-Օկլենդ չվերթն իրականացրել է А380-ը, սակայն շարունակական ավիահաղորդակցության համար, ըստ որոշ տվյալների, կօգտագործվի Boeing 777 ինքնաթիռ:
Նախորդ ռեկորդը սահմանել էր ավստրալական Qantas ավիափոխադրողը 2014-ին: Ինքնաթիռն իրականացրել էր չվերթ Սիդնեյից Դուբայ՝ 13,8 հազար տարածությունը հաղթահարելով գրեթե 17 ժամում:
Emirates Airline-ը պլանավորում է նաև գործարկել ուղիղ ավիահաղորդակցություն Դուբայից Պանամա, որը կտևի 17 ժամ 35 րոպե:
Singapore Airlines-ն ավելի վաղ իրականացնում էր Սինգապուր-Նյու Ջերսի թռիչքը, որը տևել է 19 ժամ: Ավիափոխադրողը 2015-ին հայտարարել է, որ պլանավորում է վերսկսել թռիչքները 2018 թվականին:
