Կոսմետիկ ապրանքների խոշորագույն արտադրող Johnson & Johnson-ը տուգանվել է 72 միլիոն դոլարով
ԱՄՆ Միսսուրի նահանգի դատարանը պարտավորեցրել է կոսմետիկ ապրանքների խոշորագույն արտադրող Johnson & Johnson ընկերությանը վճարել 72 մլն դոլար այն կնոջ ազգականին, ով մահացել է քաղցկեղից, հայտնում է TASS-ը:
Համապատասխան որոշումը հրապարակել է Սենտ-Լյուիս քաղաքի երդվյալ ատենակալների դատարանը: Ընկերության դեմ դատական հայց էր ներկայացրել Ալաբամա նահանգի բնակիչ Ժակլին Ֆոսքի ընտանիքը, ով 62 տարեկանում մահացել էր անցած տարվա հոկտեմբերին ձվարանների քաղցկեղից:
Ազգականները պնդում են, որ կինն այդ հիվանդությունը ձեռք է բերել այն բանից հետո, երբ 35 տարի շարունակ օգտվել է ամերիկյան ընկերության արտադրանքից, այդ թվում՝ ինտիմ հիգիենայի համար նախատեսված միջոցներից ու մանկական ցանափոշուց:
Արդյունքում՝ երդվյալ ատենակալների դատարանը կոնգլոմերատին մեղավոր է ճանաչել խարդախության մեջ ու մեղադրել տեղեկությունը թաքցնելու մեջ, որ իր արտադրանքը կարող է վնաս հասցնել առողջությանը:
Johnson & Johnson-ը հայտարարել է, որ հիասթափված է դատարանի որոշումից, սակայն չի ընդգծել, թե կբողոքարկի դատարանի որոշումը:
